_1704867435.jpeg)
धरान: धरान १५ स्थित शिक्षा सदन मावीले ६९ औं वार्षिकोत्सब तथा अभिभावक दिवस शनिबार भव्यतापुर्वक मनाएको छ ।
उक्त समारोहका प्रमुख अथिती एवं कोशी प्रदेशका मुख्यमन्त्री हिक्मत कुमार कार्कीले सरकारी विद्यालयहरूलाई प्रतिस्पर्धी र गुणस्तरीय बनाउनुपर्नेमा जोडदिएका थिए । समारोहलाई सम्बोधन गर्दै मुख्यमन्त्री कार्कीले सामुदायिक विद्यालयको सुधार गरेर अघि बढेमा शैक्षिक सुधार हुने बताए ।
उनले अहिले नै निजी विद्यालयहरू बन्द गर्न सम्भव नभएको उल्लेख गर्दै त्यतातिर लाग्न नहुने पनि बताए । केही मानिसहरुको आवाज निजी विद्यालय बन्द गर्नुपर्ने रहे पनि नेपालको कानुन र संविधानसम्मत ढंगले चलेका विद्यालय चल्न दिनुपर्ने मुख्यमन्त्री कार्कीको भनाई थियो । 'अहिले नै हामीले आवेगमा निजी विद्यालय बन्द गर्ने भावनामा बग्यौ भने त्यो राज्यले थाम्न सक्दैन' उनले भने, 'हामी हाम्रा विद्यालयहरुलाई नै सुधार गर्न लागौँ।'
मुख्यमन्त्री कार्कीले सरकारी विद्यालयहरूको सुधारका लागि ठूलो लगानी गरिरहेको उल्लेख गर्दै उनले विद्यालय भवन निर्माण, पाठ्यपुस्तक उपलब्धता, शिक्षक तलब तथा छात्रवृत्तिजस्ता क्षेत्रमा व्यापक खर्च भइरहेको जानकारी दिए । विद्यालय व्यवस्थापन समितिहरूले आफ्नो जिम्मेवारी सही रूपमा जिम्मेवारी निर्वाह गर्न सकेमा सरकारी विद्यालय पनि निजी विद्यालयभन्दा कम नहुने धारणा उनको थियो ।
मुख्यमन्त्री कार्कीले धरानको प्रमुख समस्या पानी रहेको उल्लेख गर्दै प्रदेश सरकार यसको समाधानमा प्रतिबद्ध रहेको बताए । उनले गतवर्ष चारवटा डिप बोरिङ निर्माण गरिएकाले केही सहज भएको उल्लेख गर्दै दीर्घकालीन समाधानका लागि संघीय सरकारसँग समन्वय भइरहेको जानकारी दिए । कार्यक्रममा जेहेन्दार, दलित तथा प्रथम भएका विद्यार्थीहरूलाई छात्रवृत्ति प्रदान गरिएको थियो।
