धरान: लागुऔषधसहित धरानबाट प्रहरीले २ जना पक्राउ गरेको छ । 

जिल्ला प्रहरी कार्यालय सुनसरीका अनुसार धरान ५ का २५ बर्षीय दिपेश लिम्बुलाई सोमबार साढे ७ बजे पक्राउ गरेको हो । लिम्बुले लागुऔषध कारोबार गरिरहेको भन्ने गोप्य सुचनाको आधारमा प्रहरी हवल्दार सत्यमान लामा र अस्थायी प्रहरी पोष्ट देउरालीबाट असई बिष्णु राजवंशीको कमाण्डमा प्रहरी टोली खटिएको थियो । 

प्रहरी टोलीले लिम्बुको कोठाबाट लागुऔषध ट्रामाडोल ५१५ क्याप्सुल, डाईलोसिस २० लेखिएको ४६० ट्याब्लेट, प्रतिबन्धित औषधी स्पास्पेन ५ ट्याब्लेटसहित नियन्त्रणमा लिएको सुनसरी प्रहरीले जनाएको छ । उनको बारेमा थप अनुसन्धान कार्य भईरहेको प्रहरीको भनाई छ । 

यस्तै, सोही राती करिब ९ बजे धरान १६ पुलचोकबाट  १८ बर्षीय सुमन श्रेष्ठलाई पनि लागुऔषधसहित नियन्त्रणमा लिएको छ । अस्थायी प्रहरी बिट जोरसखुवाबाट हवल्दार हेमराज सुवेदीको कमाण्डमा खटिएको गस्ती टोलीले उनलाई नियन्त्रणमा लिएको हो । 

प्रहरीले शंका लागेर चेकजाँच गर्दा उनले पछाडी भिरेको कालो ब्यागमा  ट्रामाडोल ५१५ लेखिएको २०७ क्याप्सुल र प्रतिबन्धित औषधी स्पासपेन २६० चक्की वरामद भएको थियो । उनलाई पनि नियन्त्रणमा लिएर इलाका प्रहरी कार्यालय धरानले आवश्यक अनुसन्धान गरिरहेको जनाएको छ ।