_1704867435.jpeg)
धरान: बिहिबार २५ औं गोधुली रनिङ कपको उद्घाटन समारोह शुरु हुनुअघिसम्म पनि आयोजक गोधुली क्लबका पदाधिकारीहरुकै मन कता कता डराइरहेको थियो ।
२५ औं सँस्करणलाई बिशेष बनाउन यसपाली धरान १६ स्थित रंगशालामा फ्लडलाइट जडान गरिएको थियो, र पहिलो पटक राती प्रतियोगिता आयोजना हुदैथियो । धरानको फुटबलको इतिहासमा रात्रीकालिन खेल पहिलो पटक आयोजना भएकोले पनि के होला, कसो होला भन्ने थियो । साथै, खेल हेर्न दर्शकहरुको उपस्थिति कस्तो होला भन्ने संशय थियो ।
तर, जब उद्घाटन समारोह शुरु भयो, आयोजक मात्र होइन, खेल हेर्न आएका दर्शकहरु आफै पनि अचम्मित भए । टिकट काटेर खेलप्रेमी दर्शकहरु प्याराफिटमा भरिए, आयोजकले पनि २५ औं (रजत जयन्ती) सँस्करणलाई भव्यता बनाउन कुनै कसुर बाँकी राखेन।
रंगशाला प्रवेश गर्दादेखि नै झिलिमिली बत्ति बालेर रौनक बढाएको थियो । अझ उद्घाटन समारोहमा चर्चित गायक पुर्ण राई एण्ड दाजुभाईको प्रस्तुतीले २५ औं सँस्करणलाई बिशेष बनायो । खेल शुरु हुनुअघि आतिशबाजीले पनि उद्घाटन समारोह भव्य बनाएको थियो ।
उद्घाटन समारोहका प्रमुख अतिथि एवं वडा नं १७ का अध्यक्ष सुर्यबहादुर भट्टराईले गोधुली कपले रात्रीकालिन फुटवल शुरुवात गरेर धरानको खेलकुदमा नयाँ आयाम थपेको बताए । उनले आगामी बर्ष भाडाको नभै सरकारबाट निर्माण भएको फ्लडलाइटमा नै प्रतियोगिता हुने वातावरण बनाउन सम्बन्धित निकायले ध्यान दिनुपर्नेमा पनि जोड दिए । कोशी प्रदेश फुटबल संघका अध्यक्ष किसोर राईले पनि प्रदेश सरकारसँग फ्लडलाइटको माग गरेको र आगामी बर्षको बजेटमा व्यवस्थापन हुने अपेक्षा व्यक्त गरेका थिए ।
उद्घाटन खेलमा वडा ५ विजयी
२५ औं गोधुली रनिङ कपको उद्घाटन खेलमा वडा नं ५ विजयी भएको छ । प्रतिस्पर्धात्मक खेलमा वडा नं १६ लाई २–१ गोलअन्तरले पराजित गर्दै वडा ५ दोस्रो चरणमा प्रवेश गरेको हो ।
भिडियो:
वडा नं ५ को लागि पहिलो हाफको १७ औं मिनेटमा सुजन इङ्गनामले गोल गरेका थिए । तर, २८ औं मिनेटमा वडा १६ का सरुन श्रेष्ठले गोल गर्दै खेल बराबरी बनाएका थिए । तर, दोस्रो हाफको २२ औं मिनेटमा तिलबिक्रम लावतीले गोल गर्दै वडा नं ५ लाई २–१ को नतिजा दिलाउदै विजयी गराए ।
खेलको म्यान अफ दि म्याच वडा ५ का तिलबिक्रम लावती घोषित भए । प्रतियोगितामा भोली (शुक्रबार) वडा नं १० र १२ बीच खेल हुने आयोजक गोधुली क्लबले जनाएकोछ ।
तस्बिरहरु: विकास चाम्लिङ राई
